Persuttaaneq sunaava?

 


Timikkut persuttaaneq

Timikkut persuttaaneq persuttaaneruvoq inuit arlallit ’persuttaanivittut’ isigisagaat, pissutigalugu tilluusanik takussaasunik kinguneqartarmat annernartarlunilu.

  • Nutsuineq, issuttuussineq, patittaaneq, tilluaaneq arlaannilluunniit tigumiaqarluni unataaneq.

  • Isimmissaaneq, pequtinut, iikkamut, majuartarfikkut ammut assigisaanilluunniit ajatsineq.

  • Qimitseriarneq, savimmik aallaammilluunniit sakkoqarluni saassussineq.


Aserorterinikkut persuttaanerit

Aserorterinikkut persuttaanerit ilinnut inuttut sammisuunngillat, paarlaalluguli illit nammineq pigisannut sammisuulluni.

Aserorterinikkut persuttagaasinnaavutit:

  • Aapparisavit inuulluunniit allap pigisatit ilinnut pingaaruteqartut naleqartulluunniit aserortilerpagit.

  • Inuup atisatit nutsullugillu alittorpagit, pigisatilluunniit igillugit.

  • Nammineq pigisavit atornissaat tigunissaalluunniit inerteqqutigineqarpoq.

 
 


Kinguaassiuutitigut persuttaaneq

Inuup allap kissaatiginngisaanik kinguaassiuutitigut iliuuseqarnissamut toqqaannartumik toqqaannanngikkaluamilluunniit pinngitsaaliineq.

Kinguaassiuutitigut innarliinermut assersuutit:

  • Nuanninngitsumik kinguaassiuutinut tunngasumik attuuaneqarneq

  • Pinngitsaaliilluni atoqateqarniarneq

  • Pinngitsaalilluni atoqateqarneq


Digitaliusumik persuttaaneq

Digitaliusumik persuttaaneq tarnikkut persuttaanermut assinguvoq, inuup eqqugaasup nammineq kissaatiginngisaanik pissusilersornermut iliuuseqarnermullu (stalking) eqqaanartoq.

Taamaattoq digitaliusumik persuttaanerup immikkoorutigaa, taamaallaat internet aqqutigalugu innarliinerit pisarmata. Tamanna assersuutigalugu inuttut attaveqaatit imaluunniit mobiilit aqqutigalugit pisinnaavoq.

  • Attaveqaatit digitaliusut aqqutigalugit sioorasaarneqarputit.

  • Atisaqarnak assitit siammarterneqarput.

  • Hackerneqarputit, tassuunakkut inuk alla illit pillutit allat susassarinngisaannut isersinnaalerluni, soorlu sianerfigisimasatit takusinnaalerlugit, sms-itit atuarsinnaalerlugit GPS-illu takusinnaalerlugu.

  • Kikkut telefonikkut oqaloqatigineritit allaqatigineritillu nakkutigisaapput.

 
 


Tarnikkut persuttaaneq

Tarnikkut persuttaaneq tassaavoq inuup pissaaneq imaluunniit siooarasaarineq tunngavigalugit allanik arlaleriarluni ajoqusiisinnaasumik, qunusaarutaasinnaasumik, innarliisinnaasumik naalagarsiortitsisumilluunniit pissusilersornera.

Tarnikkut persuttaanermut assersuutigalugu ilaasinnaapput:

  • Toqqartumik siorasaarinerit

  • Nakkarsaasumik nikanarsaasumillu pissusilersorneq

  • Nakkutilliineq mattussinerlu.