Aqutsisunut
Tassa! Persuttaasarneq pitsaaliorniarlugu suliniutaavoq, inuusuttut attaveqatigiinnernut peqqinnartunut peqataalerlutillu taakkunannga pilersitsisarnissaannik siunertaqartoq.
Tassa! 7., 8. aamma 9. klassini atuartunut sammisaqartitsiffiuvoq, tassanilu atuartut ingerlatsinerit sungiusaatillu assigiinngitsut aqqutigalugit persuttaasarneq pillugu ilisimasaqalissapput, persuttaasoqalersillugu pissusilersornissaminnut periusissinneqassallutik aamma persuttaanermik misigisaqassagunik iliuuseqarnissamut sapiissuseqalersinniarneqassallutik.
Tassa! Atuartitsissutini inuttut inerikkiartornermi, inuiaqatigiilerinermi, danskit oqaasiini, kalaallit oqaasiini aamma timersornermi ilikkagassatut anguniagassanut naapertuuppoq, taamaalillunilu atuartitsissutit akimorlugit atuartitsivissatut suliaalluni, atuartullu ilikkagassaattut piumasaqaatinik piviusunngortitsilluni. Atortussiat suliaavoq ilaatigut ilinniartitsisut atuartut silarsuaannik pissusiviusunillu atortussiat atuuffissaannik ilisimasaqarluartut suleqatigalugit.
Tassa!-mik sammisaqartitsiviusumi suut piumasaappat?
Minnerpaamik tiimit atuartitsiviusut 15-it atorneqarnissaanut inissaqartitsineq
Atuarfimmi isumaginninnermi siunnersorti/atuartunik kaammattuisartoq/AKT Tassa!-mik sammisaqartussaanermik ilisimatinneqassapput, arlaatigullu peqataatinneqarnissaannut piareersimatinneqarsinnaaneri
Illit pisortatut pisariaqalerfiatigut sammisaqartitsineq sioqqullugu kingornagullu ilinniartitsisunik tapersersuinissannut periarfissaqarnissat.
Peqataaniarussi uunga bjn@fgb.dk -mut nalunaarlusi, taamaasillusilu ilinniartitsisut peqataasussat ”psykisk forberedelse”-mik taasamut peqataanissaannut aqqutissiuullugit.
Tassa!-mut sammisaqarfiusumi peqataanissigut, ilissi atuarfittut inuusuttut attaveqatigiiffinnut peqqinnartunut persuttaaffiunngitsunut peqataasalernissaannut periarfissaannik patajaallisaaqataassaasi, inuusuttunut ataasiakkaanut minnerunngitsumillu atuarfissinni ataqatigiinnermut iluaqutaasumik.
Inussiarnersumik inuulluaqqusilluta
Tassa!-mi suleqatigiit
Kallaallit Nunaanni meeqqat inuusuttullu pingajorarterutaat persuttaanermik qanimut misigisaqartarlutik peroriartortarput, tamatumanilu maluginiagassaavoq uani kisitsisit ilisimaneqartut kisimik pineqarmata, tassami Kalaallit Nunaanni Politiit naapertorlugit kisitsisit annertunerujussuupput – annermik tarnikkut, digitaliusumik aamma aserorterinikkut persuttaanerit ilanngunneqarpata.
Persuttaasarneq qanimut misigisarlugu peroriartorneq inuusuttunut ataasiakkaanut annertuunik siamasissunillu kinguneqarsinnaavoq, ukkassisinnaanermikkut ajornartorsiuteqalersinnaallutik aamma avatanngiisiminnut tatiginnikkunnaarlutik minnerunngitsumillu imminnut upperiunnaarlutik.
Persuttaasarnerup taama ittup inuusuttut inersimasunngornerinut malersortuarsinnaavai, allatut periusaasinnaasunik ilikkagaqarsimannginnerat pissutigalugu. Tamanna naammaginanngilaq, taamaammallu piffissanngorpoq tamatta ataatsimoorluta oqarnissatsinnut: TASSA!