Asasavut angajoqqaat
Ikinngutaalluartoq qanoq ittuua? Allat piinnarlugit iliuuseqartarnerup killissaa sumiippa? Tamakku aamma allarpassuit meeqqavit ukioq manna TASSA!-mi sammisaqartitsinermi ”Uanga, uagut allallu”-mik taasami sammissavai.
Ingerlatsinermi qitiutinneqassapput inuusuttut akornanni peqqinnartumik attaveqatigiittarnerit, aamma qanoq iliorluni inuusuttut akornanni persuttaasoqartarnera pitsaaliorneqarsinnaanersoq. Taamaammat ullut ingerlanerini meeqqavit ilisimasaqarfigilissavai nammineq killissarisani allallu killissarisaat, naaggaarsinnaanissaq aamma persuttaasoqalissappat iliuuseqarnissaminnut periarfissani.
Meeqqanut angajoqqaat isumaat immikkut pingaaruteqartuupput, taamaammat meeqqannut qanoq oqaluttarnerit, meeqqavit inuusuttunut allanut attaveqarnermini paasinnittarneranut, misigisarneranut pissuseqarfiginnittarneranullu pingaaruteqaqaaq.
Quppernermi uani meeqqavit peqqinnartumik persuttaaffiunngitsunillu allanut attaveqarnissaanik pitsaanerpaamik tapersersornissaanut isumassarsiorsinnaavutit.
Tassa? Sunaava?
Tassa! Tassaavoq persuttaasarnermik pitsaaliuniarluni suliniut, inuusuttut peqqinnartunik attaveqarsinnaanermik piginnaasaqarlualernissaasa patajaallisarnissaannik siunertaqartoq. Tassa! 7.-9. klassini sammisaqartitsinertut aaqqissuussaavoq, tassanilu inuusuttut sammisassat sungiusaatillu assigiinngitsut aqqutigalugit persuttaasarneq, persuttaanertalimmik pisoqartillugu pissuseqarnissamut atorsinnaasaminnik persuttaanermillu naammattuugaqarnerminni iliuuseqarnissaminnik ilinniartinneqassapput.
Tassa! Atuartitsissutini ukunani ilikkagassatut anguniagassanut naapertuuppoq: inuttut inerikkiartorneq, inuiaqatigiilerineq, danskit oqaasii, kalaallit oqaasii aamma timersorneq, taamaalillunilu atuartitsissutit akimorlugit ingerlatassatut aaqqissugaalluni, atuartut ilikkagassaattut piumasaqaatinut tulluussagaalluni.
Atortussiat ilaatigut suliarineqarput ilinniartitsisut atuartut silarsuaannik pissusiviusunillu atortussiat atuuffissaannik ilisimasaqartut suleqatigalugit.
Angajoqqaatut …
Nittartagaq misissuataarsinnaavat tassanilu persuttaasarneq pillugu meeqqavit ilikkagassai paasisaqarfigalugit
Meeqqavit persuttaasarneq pillugu isumaanik oqaloqatigisinnaavat – isumassarsiorfiusinnaasut uaniipput uunga linki: persuttaasarneq sunaava
Misigissutsit persuttaasoqarnerata nassatarisinnaasai qanorlu misigissutsit taakku pissuseqarfigineqarsinnaanersut pillugit meeqqat oqaloqatigiuk
Atuarfimmi suut ilinniarsimaneraat alapernaasikkit, taakkulu pillugit meeraq oqaloqatigalugu
Ingerlatsinerup nalaani kingornagullu meeqqavit qisuariaatigisinnaasai maluginiakkit
Oqaloqatigiilluarnissamut siunnersuutit
Meeqqannut nutaarluinnaasinnaavoq killissarisat, ikinngutigiinnermi akunnattoorfiit aamma ataatsimut isigalugu peqqinnartumik attaveqatigiittarnerit pillugit sammisaqarnissaq.
Meeqqavit oqaloqatiginissaanut isumassarsiorfittut uku atorsinnaavatit: oqaloqatigiinnermut kortit aamma illit nammineq apeqqusiornissat periarfissaavoq.
Artornartut pillugit oqaloqatigiinneq iluaqutaasarpoq
Artornartut pillugit oqaloqatigiinnerup meeqqat ajoqusernavianngilaa. TASSA!-mik sammisaqarnermut atatillugu meeqqat kingunipilutsitsinartunik eqqugaassappat pingaartuuvoq meeqqavit qanimut eqqissisimasumillu naaperiarnissaa, isumassornissaa paasinissaalu.
Meeqqavit misigissutsit siusinnerusukkut aqqusaarsimasani qisuariaatigisinnaavai, tamannalu ajunngilaq. Misigissutsit tassaapput misigisimasanut timip qisuariaatai pissuseqarfiginninnerilu. Taamaammat artornarsinnaasut oqaluuserinissaat ernumagissanngilat.
Pingaarnerpaavoq naalaarnissaq, taamaaliornikkummi takutissavat misigissutsit artornartut oqallisiginissaat ajunngitsoq.
Ikiortariaavit?
Timikkut persuttaaneq tassaasinnaavoq unataaneq, isimmissaaneq imaluunniit ajattaaneq. Persuttaaneq aamma tarnikkut persuttaanertut saqqummersinnaavoq, toqqaannartumik sioorasaarinertut, nakkarsaalluni nikassaallunilu pissusilersornertut.
Illit nammineq persuttagaasarnerit, persuttagaasartunik nalunngisaqarnerit imaluunniit illit nammineq aapparisannik persuttaasarnerit apeqqutaatinnagit, ikiuisinnaasoqarpoq. Ikiortissarsiorusukkuit una tooruk.
Ikioqqusinnaaneq nukiuvoq!