Sapaatip-akunnera Tassa!-mik sammisaqarfiusoq sioqqullugu, ingerlannerani kingornagullu eqqarsartaatsikkut piareersarneq
Asasarput ilinniartitsisoq
Persuttaanermut tunngasunik sammisaqarneq mianernartoqarsinnaavoq – ilinnut ilinniartitsisutut aamma atuartunut. Taamaammat quppernermi uani sammisassaq pillugu qanoq eqqarsartaatsikkut piareersarsinnaanerit aamma ingerlatsinissinni qanoq atuartunik tapersersuisinnaanerit pillugit inassuteqaatinik saqqummiussissaagut.
Kalaallisoortaa 2025 qiterparnerani saqqummissaaq.
Sapaatip-akunnera Tassa!-mik sammisaqarfiusoq sioqqullugu
Sapaatip-akunnerani Tassa!-mik sammisaqarfiusumi arlaatigut sunnerneqassaguit suut pisariaqartissanerlugit allattukkit
Assersuutigalugu immaqa ikinngutigilluakkannik oqaloqateqarnissat pisariaqartissavat, immaqa pinngortitami pisuttuarusussinnaavutit, yogarlutit imaluunniit allarluinnarmik sammisaqarlutit. Taamaaliornikkut pisariaqalerfiatigut illit nammineq iliuuseqarnissamut sillimanerit atorsinnaalerlugulu maluginiarsinnaavat.
Kikkut oqaloqatiginiarnerlugit allattukkit
Allatavit ilaat attavigikkit oqaluttuullugillu persuttaasarnermik pitsaaliuineq pillugu sapaatip-akunnera suliffinni sammisaqartitsiniarlutit, imaassinnaasorlu Tassa-mit arlaatigut sunnerneqartutit, taammallu attaviginissaat pisariaqartilersinnaallugu.
Pisut ajornerpaaffigisinnaasaattut takorluukkat:
Sapaatip-akunnerata Tassa!-mik sammisaqarfiusup ingerlanerani ajornerpaatut takorloorsinnaasatit pillugit titarnernik marlussunnik allataqarit. Kingornagullu taama pisoqassappat qanoq iliuuseqarfiginissaat allakkit.
Pisortarisat aamma atuarfimmi kaammattuisartoq/isumaginninnermi siunnersorti /atuarfinni pissusilersorneq
…attaveqarneq ingerlalluarnissarlu pillugit suliaqartoq ilisimatikkit sapaatip-akunnerani persuttaasarneq pitsaaliorniarlugu suliniummik ingerlatsilerlutit, aamma imaassinnaasoq ikiorneqarnissat pisariaqartilerit. Pitsaanerpaamik qanoq ikiorserneqarsinnaanerit oqallisigisiuk. Assersuutigalugu imaassinnaavoq atuarfimmi kaammattuisartoq/isumaginninnermi siunnersorti /atuarfinni pissusilersorneq, attaveqarneq ingerlalluarnissarlu pillugit suliaqartoq isumaqatigiissuteqarfigisinnaagitit inuusuttut oqaloqateqarnissaminnik pisariaqartitsisut oqaloqatiginissaannut piffissaliisinnaasut.
Ingerlatsinerup nalaani
Sammisassaq pillugu ilisimatitsinissat ernumagissanngilat
Artornartut eqqartornerat inuusuttunik ajoqusiineq ajorput. Paasititsiniaanermut atatillugu inuusuttoq kingunipilutsitsilissappat (eqqaasaqarluni, angerlarsimaffimmini pisimasoq eqqarsaatigilerlugu il.il.) pingaartuuvoq qanimut eqqissisimasumillu naaperiarnissaa, isumassorlugu paasilluarlugulu. Inuusuttut siusinnerusukkut misigissuserisimasatik qisuariarfigisinnaavaat tamannalu ajunngilaq. Misigissutsit tassaapput misigisanut timip qisuariaaserisartagaasa pissuseqariaasiisalu ilaat. Taamaammat artornarsinnaasut oqallisiginissaat ernumagissanngilat.
Inuusuttup tatigalutit oqaluttuuppatit pingaartuuvoq tusarnaarnissat
Taamaalioruit inuusuttup pimoorunneqarnini misigissavaa, taamaalillutillu inuusuttup misigisimasaanik akuersaaqataassaatit. Amerlanertigut tusarnaaginnarnissaq naammattarpoq – soorlu ikinngutit taamaaliorsinnaasartoq, kisianni ernumanarsinnaasunik inuusuttup oqaluttuupatit – assersuutigalugu angerlarsimaffimmini persuttaasoqartarneranik, nalunaarutiginnittariaqarputit. Tamatuma saniatigut inuusuttoq Tusaanngamut, Politiinut imaluunniit Najortimut saaffiginninniarnerani ikiorsinnaavat.
Kingornagut
Sapaatip-akunnerata Tassa!-mik sammisaqarfiusup naammassereernerata kingorna aamma qisuariaatinik saqqummersoqarsinnaavoq. Taamaammat makkua eqqumaffiginissaat isumassarsiatsialaasinnaavoq:
Pissusilersuutit allanngornerat
Eqqumaffigiuk atuartitavit ilaat allatut pissusilersulernersut. Soorlu inuusuuttut ilaat siornatigut oqallortuut nipaalerlutillu imminnut mattunnersut. Aamma inuusuttut ilaat annertunerusumik avammut qisuariartalersinnaapput.
Ataatsimooqatigiit akornanni pissusilersuutit nutaat
Klassimi ataatsimooqatigiittartunik nutaanik pilersoqarpa? Klassimi ataqatigiinneq qanoq ippa? Assersuutigalugu: assortuuttarnerit annikinnerulersutut misigivigit? Assortuuttarnerit pissuseqarfigisarneranni allannguutinik misigisaqarpit?
Periutsit ataavartikkit
Nutaanik periuseqalerneq nalorninarsinnaavoq- timip periusitoqqat eqqaamasarpai. Taamaattumik aporfinnik qaangeeriasertaarisap utertarnissaa aamma pingaaruteqarpoq. Imaassinnaavoq aporaaffeqartoqartoq, taamaasillutit atuartut iliuutsinik nutaanik periuseqalersinnaanerannut Tassa!-mik ingerlatsinermi ilinniartitsissutigineqartut eqqaaseqqinnissaannut piffissanngorsimasoq.
Pitsaasumik annertusaaneq – oqaluttuat nuannersut erseqqissartakkit
Atuartut assersuutigalugu nuannersumik ataatsimooqatigiilersitseqataasut imaluunniit ikioqatigiilluartartut ersersinniartakkit.