Oqallisigisiuk!

Ingerlatsinerup matuma artornartut immaqalu annernarsinnaasut pillugit eqqartuinissamut atuartut sakkussissavai. Atuartut misigissutsimik oqaasertalernissaat ilinniassavaat inuillu allat misigissusaasa paasinissaannik sungiusassallutik.

 

Ilinniartitsineq 1 og 2

Ilisarititsineq (5 min.)

Ilinniartitsinermi matumani atuartut podcast ”Kuseriarneq” (Dråben) tusarnaassavaat, tassani pineqarpoq nukappiaraq kattunneqarluni unatartissimasoq, ataatsimooqatigiinnilu imminut inissinniapiloortoq.

Sammisassat makku allattarfikkut allakkit:

  1. Podcast ”Kuseriarneq” (Dråben) tusarnaarsiuk (20 min.)

  2. Suleqatigiinneq: ”Kuseriarnermut” tunngatillugu apeqqutit suliarisigit (45 min.)

  3. Klassimi ataatsimoorluni eqikkaaneq (20 min.)

Sungiusaat 1: ”Kuseriarneq”/Dråben) tusarnaarsiuk (20 min.)

Podcast ”Kuseriarneq” (Dråben) tamassi tusarnaassavarsi. Podcastimi nukappiaraq Kuluk ataatsimooqatigiinni imminut inissinniapiloortoq naggataatigullu tamatumannga kinguneqartitsisoq pineqarpoq. Podcasti minutsinik 14-inik sivisussuseqarpoq.

Podcast uani tusarnaarsinnaavat:

Sungiusaat 2: Suleqatigiikkaarluni oqallinneq: Kuseriarneq (Dråben) (45 min.)

Atuartut suleqatigiikkaarlutik podcastimi ”Kuseriarneq” pillugu apeqqutit uku oqallisigissavaat:

  • Kuluk pitsaanerusunik atugaqalerumalluni qanoq iliorpa?

  • Illit taama atugaqartuuguit qanoq iliussagaluarpit?

  • Suut allaanerusumik iliuuserissagaluarpigit?

  • Kulummut ikinngutaasuuguit, qanoq siunnersussagaluarpiuk?

Apeqqutit atuartunut uani naqissinnaavatit.

Atuartut pingasut-sisamakkaarlugit suleqatigiisikkit. Atuartut akissutiginiakkaminnut atatillugu oqaatsit eqqaamasassatik allattussavaat, akissutigisatik klassip sinneranut saqqummiussinnaajumallugit. Suleqatigiit ilaata akissutitik klassip sinneranut saqqummiutissavai. Saqqummiussisussaq suleqatigiit namminneq toqqassavaat.

Sungiusaat 3: Apeqqutit ataatsimoorluni oqallisiginerat (20 min.)

”Kuseriarnermut” (Dråben)  tunngatillugu apeqqutit ataatsimoorlusi oqallisigissavasi. Apeqqutit ataasiakkaarlugit oqallisigisigit, immikkullu maluginiaruk atuartut misigissutsit qisuariaatsillu suut ersersinneraat. Naggasiullugu atuartut Kulummut siunnersuutaat allagartarsuarmut allassigit, taannalu klassimi nivinngarlugu.

Apeqqutit:

  • Kuluk pitsaanerusunik atugaqalerumalluni qanoq iliorpa?

  • Taama atugaqartuuguit qanoq iliorsimassagaluarpit?

  • Suut allaanerusumik iliuuserissagaluarpigit?

  • Kulummut ikinngutaasuuguit qanoq siunnersussagaluarpiuk?

 

Ilinniartitsineq 3

Ilisarititsineq (5 min.)

Ilinniartitsineq 3-mi atuartut paasissavaat, inuunerminni inuit kikkut isumalluutigisinnaanerlugit, inullu taanna pisuusaartitamik allaffigalugu.

Sammisassat uku allattarfikkut allakkit:

  1. Nammineerluni eqqaasanik saqqummiussuineq ”Inuk kina isumalluutigisinnaavara?” (15 min.)

  2. Inuit isumalluutigisinnaasavit ilaannut sms-imik allagit (20 min.)

  3. Klassimi ataatsimoorluni eqqaasanik saqqummiussuineq (15 min.)

Sungiusaat 1: Nammineerluni eqqaasanik saqqummiussuineq ”Inuk kina isumalluutigisinnaavara?” (15 min.)

Sungiusaammi siullermi atuartut paasissavaat, artornartorsiorfimminni imaluunniit ikiortariaqalernerminni inuk kina saaffigisinnaanerlugu. Inuit isumalluutigisinnaasat ilisimanerat, tassaavoq iliuuseqarnissamut piareersimanerup ilaa, inuup ajornartoorfimminik qaangiinissaanut ikorfartuutaasinnaasoq, taamaammallu ilisimassallugu iluaqutaasinnaasoq.

Aallaqqaasiullugu inuk isumalluutaasinnaasoq sunaanersoq oqallisigisiuk. Nassuiaataasinnaasut ilaat makkuupput:

Inuk isumalluut tassaavoq, inuk artornartorsiorfimmi aliasuffimmiluunniit qaqugukkulluunniit oqaloqatigineqarsinnaasoq.

Tassaavoq inuk tatigisaq – assersuutigalugulu tassaasinnaalluni ilinniartitsisoq, ikinngut imaluunniit ilaqutaq.

Inuk isumalluutigisinnaasara tassaavoq __________ (isumalluutigisinnaasavit ilaat assersuutitut allaguk).

Artornartorsiorfissinni aliasuffissinniluunniit inunnik ilissinnik ikiorsiisinnaasunik attavigisinnaasassinnik allanik assersuutissaqarpisi?

Qulaaniittoq inuup isumalluutigisinnaasap nassuiarnissaanut assersuutaaginnarpoq. Soorunami illit nammineqqinnaaq nassuiarsinnaavat. Pingaarnerpaaginnartumik atuartut suliassamik aallartinnginnerani paasissammassuk inuk isumalluutigisinnaasaq sunaanersoq.

  • Pappiara eqqaasanik saqqummiussuiffiusinnaasoq agguaaguk.

  • Atuartut ataasiakkaarlutik inuk isumalluutigisinnaasartik kinaanersoq allassavaat. Imaappoq artornartorsiorfimminni kina attavigisinnaanerlugu. Atuartut inummik isumalluutigisinnaasaminnik eqqaasaqarniapiloortut ikiorsinnaavatit.

  • Tulliullugu atuartut eqqaasaminnik saqqummiussuillutik allattukkaminni inuit isumalluutigisinnaasatut allatatik pingaarnerniit tulleriiaassavaat. Tulleriiaarissapput, kina siullertut saaffiginiarnerlugu siullinngorlugu – assersuutigalugu 1. aja, 2, aanaa il.il.

Sungiusaat 2: Inuit isumalluutigisinnaasavit ilaannut sms-imik allagit (20 min.)

Sungiusaat 2-mi atuartut inummut isumalluutigisinnaasaminnut sms-mik pisuusaartitsillutik allassapput.

Toqqarsinnaavaat namminneq mobiilertik atorlugu allannissaq, imaluunniit pappiala mobiilimik assitalik allaffigalugu. Sms-i arlaannulluunniit atuarneqassanngilaq, nammineq pigineqassaaq. 

SMS-imi atuartut allassavaat, sooq inuk taannarpiaq imminnut isumalluutaanersoq. Aamma misigisimasamik ilaat, inummut sillimmatigisaminnut ingerlateqqikkusutartik allassinnaavaat.

Sungiusaatip pingaarnersaraa, atuartut misigissutsimik oqaasertaliinissaannik ilinniarnissaat – misigissuseq sunaagaluarpalluunniit. Pingaartuuvoq atuartut misigissutsiminnik saqqummiussinissamut suli piareersimanngitsut pinngitsaaliniannginnissaat – assersuutigalugu persuttaanermik misigisaqarsimagunik.

Sungiusaat 3: Klassimi ataatsimorluni eqikkaaneq eqqaasinnaasanillu saqqummiussuineq (15 min.)

Atuartut inummmut isumalluutigisaminnut sms-imik allareerpata, ima aperisinnaavatit:

  • Arlassi inuup isumalluutigisami kinaanera oqaluttuarerusuppaa?

  • Sooq inuk taannarpiaq toqqarpiuk?

Pingaartuuvoq atuartut namminneq kajumissutsiminnik akissuteqarnissaat, aamma pingaartuuvoq oqarumanngippata pinngitsaalillugit oqartinniarneqannginnissaat.

Naggasiullugu ataatsimoorlusi eqqartorsigit, kikkut saaffigineqarsinnaanersut, inuk isumalluutigisaq attaveqarfigineqarsinnaanngippat. Atuartut siunnersuutaat allattarfimmut, smartboardimut assigisaanulluunniit allakkit.

Atuartut pisortatigoortumik ikiorsiisinnaasut pillugit ilisimatikkit: Politiit, Najorti aamma Tusaannga.

 
 

PIAREERSARNISSAT

  • Sammisassaq atuaru

  • Pappiarat naqikkit

  • Atortussat ujakkit

SIVISUSSUSAA

Ilinniartitsinerit pingasut

ATUARTITSISSUTIT

Inuttut inerikkiartorneq aamma kalaallit oqaasii

ATORTUSSAT

  • Skærmi angisooq/smartboard assigisaalluunniit

  • Arkit apeqqutitallit naqikkit

  • Eqqaasanik saqqummiussuinermi allatat naqikkit

  • Mobiilimeersut naqikkit

  • Pappialaq A3

ANGUNIAGAQ

  • Atuartut misigisanik oqaasertaliisinnaanerisa patajaallisarnissaat

  • Atuartut inuit namminneq isumalluutigisinnaasatik pillugit paasinninnissaat

  • Atuartut namminneq misigissutsiminnut allallu misigissusaannut siunertamut naapertuuttumik qisuariartarnissaminnut piginnaanngorsarneqassapput

ILIKKAGASSATUT ANGUNIAKKAT

  • ajornartorsiutinik qaangiiniarnermut, kimigiisernermut, aliikkusersuinermut, isummanik tunngavilersuinermut, ilisimasanik ingerlatitseqqinnermut sunniiniarnermullu oqaatsit atorsinnaassagaat kiisalu oqaatsit taalliortorpalaartumik atorneqartarnerat ilisimasaqarfigissallugit (kalaallit oqaasii, akulliit)

  • oqaloqatigiinnerni oqaluunnernilu allat oqaluinnarlutik saqqummiussinerini tusarnaarluarsinnaassasut ammasuullutik, paasiniaasuullutik nalilersuisuullutillu (kalaallit oqaasii, angajulliit)

  • inuit akunnerminni pissusiisa assigiinngitsuusut ineriartortinneqarnissaannut inuppalaartumik piginnaasassat pisariaqartut piginnaasaqarfigissagaat (Inuttut inerikkiartorneq)